Chegou o Nadal! 🎄🎅⭐🌟

 Este mércores día 20, visitamos a vila de Celanova. 

Tivemos a oportunidade de ver o seu decorado de Nadal, de pasear polas súas rúas a bordo do tren de Nadal e de xogar un bo anaco no campo de Minigolf montado no parque das Trigueirizas. 

Tamén nos deu tempo a interpretar e grabar unha panxoliña na praza de Vilanova dos Infantes. 

Con ela, aproveitamos para desexarvos unhas BOAS FESTAS e un FELIZ 2024! 

 

O xoves 21 de decembro, recibimos unha visita moi especial: Papá Noël! 

E cal foi a nosa sorpresa que veu cargadiño de agasallos!!

Logo, a profe Rosa invitounos a participar nuns xogos divertidísimos!! 

Finalmente, entregamos os premios do Concurso de Nadal!

 As nosas manualidades están feitas con materiais de refugallo ou de reciclaxe! 

As nosas familias tamén nos botaron unha mauciña!! Graciñas!! 

Programa Radio Nadal 2023!

 O alumnado do CEIP Plurilingüe do Xurés dende a Radio Escolar contamos unhas adiviñas de Nadal e cantamos un rap que fixemos entre todos durante os recreos dos venres. 

DÍA POLA DIVERSIDADE FUNCIONAL 💙💚💛💜

O pasado domingo día 3 de decembro conmemorouse o Día Internacional Pola Diversidade Funcional. Unha data, sen dúbida importante, que non quixemos deixar pasar. 

Quixemos achegarnos e coñecer de primeira man a realidade das persoas con Diversidade Funcional. Por iso, contactamos co alumnado e co profesorado do CEE O Pino, da cidade de Ourense, a través dunha videoconferencia. Preguntámoslle como era a vida no seu cole e nós contámoslle sobre a nosa.

 Pero tamén tivemos oportunidade de rir, cantar e bailar xuntos! 

Como non, convidámolos a unha excursión polo Parque Natural do Xurés! 

Cando rematamos a videoconferencia, puxémonos na pel das persoas con Diversidade Funcional. Por parellas, fixemos un percorrido polo cole cos ollos tapados. Con esta actividade, démonos conta das dificultades que experimentan estas persoas na súa vida cotiá e da importancia de seguir loitando e traballando para construír un mundo máis accesible para todos. 

LECTURA E FAMILIAS 📚👩👦👧👨

Hoxe, pola tarde tivemos unha hora de ler especial! 

Tres nais do cole achegáronnos a dous contos moi chulos. 

Nuria presentounos aos máis noviños "A máscara do león" e María e Mónica trouxéronnos o  libro "El fabuloso mundo de las letras", deixándonos con gañas de ler máis sobre el. 

Graciñas, familias!! 

    

25 DE NOVEMBRO 💜💟

O venres 24 de novembro e o luns 27 de novembro, levamos a cabo un conxunto de actividades para commemorar o Día Internacional para a Eliminación da Violencia contra a Muller. 

Aproveitando o bo tempo, o venres, pintamos e decoramos caixas de cartón para construír un muro contra a violencia. 

  

 

 

O luns, escribimos palabras e poemas contra a violencia e creamos unhas fermosas bolboretas de origami para decorar as caixas. Con elas, construímos un muro!

  

 

Velaquí o resultado! 

CAMPO A TRAVÉS 🏃

Hoxe tivemos unha xornada de deporte no concello veciño de Muíños. 

O alumnado de 2º a 6º de Educación Primaria, participamos no campo a través! 

Desfrutamos desta actividade con outros colexios da comarca da Baixa Limia, Celanova e Barbadás! 

Ademais de desfrutar do deporte, tamén conseguimos un terceiro posto 

e varias clasificacións para o campeonato provincial! 

MAGOSTO 🌰🌰🌰

O mal tempo non impediu que desfrutaramos dunha boa xornada de Magosto! 

Xuntos, gozamos de xogos tradicionais como encestar a castaña, 

carreiras de relevo ou o paño, entre outros! 

Ademais, degustamos un menú propio deste día, con empanada, bolo preñado e castañas con chocolate!

SAMAÍN 👻🕷🕸🎃

Este martes 31 de outubro, festexamos o Samaín no cole. 

Pola mañá, preparamos unhas sobremesas tan terroríficas como saudables, 

que degustamos no comedor despois de xantar! 

Logo, fixemos entrega dos premios do concurso de manualidades de Samaín. 

Xunto coas nosas familias, demos renda solta á nosa creatividade para crear decoracións 

de Samaín con materiais de refugallo! As cinco máis orixinais levamos un premio especial! 

A continuación, lemos o conto de Samaín que todos os cursos foramos creando na Biblioteca durante a última semana. A partir do famoso cadro "O berro" de Munch fixemos unha historia colaborativa. Quedounos ben terrorífica! 😉😏

Finalmente, rematamos a xornada cun baile con cancións propias deste día! 

VISITA DE XABIER DOMÍNGUEZ 📚 🦔

Na semana das Bibliotecas Escolares, seguimos con actividades na nosa biblio. Desta volta, no marco da iniciativa "Lectura e Familias", recibimos a Xabier Domínguez, autor da colección de contos Naturizo. 

Primeiro, contounos como é o proceso de escribir. Destacou tamén a importancia de todas as persoas que interveñen no libro, non só os propios escritores, senón tamén os ilustradores, as persoas que traballan na imprenta e no transporte e mesmo os libreiros!

Desvelounos tamén algúns detalles da súa última obra "Segredos Soterrados", que escribiu xunto a Alba De Eván. A historia desenvólvese no concello veciño de Muíños, onde os protagonistas Sabela, Jorge e a gata Morriña desfrutan do verán no campamento. Confesounos ademais que un dos personaxes do libro, Alberto, está inspirado no noso director! Que ilusión!!! 😊

DÍA DAS BIBLIOTECAS ESCOLARES 📚

Hoxe, 24 de outubro, celebramos o día das Bibliotecas Escolares, baixo o lema "Tecendo Comunidades". Foi un dia cargado de actividades que tiveron por centro a nosa biblioteca. 

Logo de recordar as normas e entregar as mochilas viaxeiras, presentáronnos a nova actividade que terá lugar na biblio: o itinerario emocional. Con el, achegarémonos a unha morea de contos que falan das nosas emocións. A continuación, realizamos un apadriñamento lector, do que gozamos moito. 

Pola tarde, recibimos unha mensaxe da mascota da biblioteca, Pancholiño. Convidábanos a viaxar con el ao longo da historia no marco do PDI "Coñecemos o pasado; vivimos o presente". Aproveitamos as imaxes do vídeo para facer unha chuvia de ideas e recompilar o que sabemos das etapas da historia e o que queremos saber. Ademais, animámonos a crear unha liña do tempo e a inaugurar o noso mural do proxecto. 

OS PRIMEIROS ANIVERSARIOS DO CURSO 🎂🎈🎉

Rematamos setembro festexando os aniversarios dos compañeiros que cumpriron anos en xullo, agosto e setembro cunha rica tarta!

 Parabéns! 

SAÍDA ÁS CÍES

Para celebrar o remate de curso os nenos e nenas do CEIP Plurilingüe do Xurés, xunto cos mestres e as súas familias visitamos as illas Cíes ás que chegamos en barco.  Acompañounos un moi bo tempo para desfrutar da auga, do sol e da area. 

Algúns animáronse a subir ata o faro para observar mellor as vistas dende alí. 

FELICES VACACIÓNS ! VÉMONOS Á VOLTA!

ANIVERSARIOS DE MAIO

 Durante o mes de maio cumpriron Anxo, Hugo e Fernando no centro. Comimos unha tarta riquísima, moitos parabéns!🎉

Día das Letras Galegas💙

O pasado martes adicamos a última hora para traballar o Día das Letras Galegas, tendo en conta ao autor a quen se lle adica este ano; Francisco Fernández del Riego realizamos un mural colaborativo todo o centro. 

O resultado foi o seguinte;

ANIVERSARIOS MES DE ABRIL

 O pasado xoves 27 de abril celebramos no comedor comendo unha tarta riquísima os aniversarios de Aitor, Elena, África e Daniela.

Moitos parabéns!

DÍA DO LIBRO 😉

 O pasado venres conmemoramos no noso centro o Día do Libro, deixamos aquí os vídeos das actuacións:

                                Que ben o pasamos! Grazas a todos e todas por vir a vernos.

ENTRADAS PARA O DÍA DO LIBRO

 Hoxe, luns 17 de abril, repartimos por todo o noso pueblo as entradas para animar á xente que veña a ver a nosa actividade o venres 21 de abril ás 12:30h xa que imos ir a residencia de maiores Virxe do Xurés a realizar a actividade "Contamos con vos". 

Deixamos algunhas fotos do reparto das entradas, esperemos que veñades todos o venres!

ACTIVIDADE "LÚA QUERE IR A MARTE"

 Este venres tivemos unha visita moi especial no cole. Viñeron a contarnos o conto de "Lúa quere ir a Marte" cuns títeres moi divertidos. Foi moi divertido. Moitas grazas por vir.

8M-DÍA INTERNACIONAL DA MULLER

 Hoxe co fin de resaltar os dereitos das mulleres a ser traballadoras realizamos unha simulación dun edificio ardendo onde salen das ventás: mulleres deportistas, mulleres periodísticas, contos infantís...

Tamén fomos a repartir flores que fixemos para regalarlle as mulleres traballadoras do Concello de Lobios. Fomos ao súper, ferretería, farmacia, perruquería, residencia de anciáns...

E para rematar a semana tivemos a visita  dun obradoiro no que Antonia Ferrín  axudou a crear constelacións e un cohete moi divertido. 

Dende o CEIP do Xurés educamos en igualdade!