No marco do programa Radio na Biblio, este xoves 13 de maio, o alumnado de 3º, 4º, 5º, e 6º de Educación Primaria recibimos a visita de Charo Pita. Charo Pita ensinounos como facer un guión radiofónico do programa "Xeografías Máxicas" baseado nas historias que ela mesma nos contou. Desfrutamos e gustounos moito as lendas que nos relatou e que tiñan por protagonistas a seres tan interesantes como Hércules, Pirene, Xerión ou Ortro, o cancerbeiro.
Graciñas, Charo!!
De ben seguro que aplicaremos todo o que nos ensinache nas nosas grabacións radiofónicas!!
Este mércores 12 de xuño, o alumnado de 4º, 5º e 6º de Educación Primaria celebramos o Día da Bici cunha ruta dende o noso cole, pasando por Vilameá ata Río Caldo. Unha vez alí, fixemos unha pequeniña ruta a pé para coñecer de préto unha das paisaxes máis fermosas do noso parque natural: a Corga da Fecha. Logo, xantamos e desfrutamos das augas termais de Río Caldo! Xa pola tarde, regresamos en bici ao cole!
Foi unha xornada moi bonita, na que puidemos gozar cos nosos compañeiros das nosas paisaxes e do deporte, compartindo moitos de nós as nosas afeccións favoritas. Repetiremos!
Podedes ver un resumo desta xornada a continuación, pero antes queremos facer un agradecemento ao grupo do GES de Lobios - en especial a Sonia e Jose Antonio - que nos escoltaron durante todo o traxecto e coidaron, en todo momento, da nosa seguridade!
Este martes 11 de xuño, un helicóptero militar estacionou ao pé do noso centro, no campo de fútbol do equipo de Lobios. Os militares, moi amablemente, convidáronnos a velo de préto e mesmo nos puidemos montar no helicóptero e poñer os seus equipamentos!
Este venres 7 de xuño, no marco do programa XOGADE e grazas á promoción da Asociación Deportiva San Rosendo, o alumnado de 4º, 5º e 6º de Educación Primaria desfrutamos dunha xornada de inicación ao kayak e ao piragüismo. Foi unha xornada perfecta na que desfrutamos do noso Parque Natural e do Concello de Muíños na compañía dos centros da Baixa Limia e do concello de Barbadás.
Despois de desfrutar moitísimo na auga e cos remos, probamos os módulos do Gladiator Race!
O alumnado de quinto e sexto de Educación Primaria, dende a materia de Ciencias da Natureza, creamos un lapbook e grabamos un programa especial de radio co fin de promocionar e recomendar hábitos saudables no marco do Plan Proxecta+ "Moita vista na escola".
No marco do Plan Director para a seguridade e convivencia dos centros educativos, a ANPA do CEIP Plurilingüe do Xurés organizou unha exhibición de medios da Garda Civil e do Ges de Lobios.
Na explanada e nas inmediacións do Pavillón Municipal de Lobios, coñecemos e desfrutamos xunto cos compañeiros do CEIP Xoaquín Lourenzo Xocas das distintas unidades da Garda Civil, como o grupo de tráfico, o destacamento de montaña, o equipo cinolóxico, criminalística, antiexplosivos, o grupo áreo, o grupo Pegasus ou o servizo de protección á natureza, entre outros.
Graciñas á nosa ANPA, á Garda Civil e ao GES de Lobios por esta xornada!
Con motivo do día dos Parques Naturais e no marco do Plan Proxecta+ "O monte vivo", este venres 24 de maio participamos nunha actividade organizada polo Parque Natural Baixa Limia - Serra do Xurés, en colaboración coa Consellería de Medio Ambiente e cambio climático.
Primeiro, achegámonos á sede do Parque para participar na votación "Vota pola natureza" e escoller dúas especies do Parque: unha de fauna e outra de flora.
A continuación, desprazámonos ata Vilameá onde tivemos unha xuntanza coa conselleira de Medio Ambiente e Cambio Climático, Ánxeles Vázquez. Ánxeles e a nosa profe Rosa liberaron dous miñotos para que estas crías de aguia poidan voar e vivir no Xurés.
Logo, María propúxonos dous xogos que desfrutamos moito: o alumnado de Educación Infantil creamos unhas pegadas dos animais máis representativos que nos emprestou María e aos máis grandiños guiounos e acompañounos na busca de oito especies de flora. Graciñas inmensas, María!!
Finalmente, achegámonos a área recreativa de Río Caldo para xantar e xogar un pouco!
Foi un día estupendo no que desfrutamos do noso parque,
No marco do programa, Lectura e Familias, este xoves día 23 de maio, visitou o noso cole a poetisa e escritora Yolanda Castaño. Primeiro, puxemos en común que é para nós a poesía e algunhas das súas características máis destacadas: a rima, os versos, as estrofas...
A continuación, presentounos e leunos o seu libro "Coller as rendas", un poemario protagonizado por animais pouco frecuentes nos libros de contos como o cachalote, o percebe, o berberecho, a carracha ou a vaca cachena. Todos eles loitaban por atopar o seu camiño e tomar as rendas da súa vida.
No marco do programa Polos Creativos e Biblioteca Creativa, traballamos arreo todo este terceiro trimestre en talleres de creación, confección e costura de bolsas e marcos de fotos para agasallar ás nosas familias nun día tan especial como o 15 de maio!